Allir fundu Fanney nema Fanney fann ei Fanney

Hið ljúfa líf

2008-06-12T17:23:00.003Z

Hef haft nóg að gera:

Fór á geggjaða Whitesnake tónleika í höllinni - rock on!
Skammast mín fyrir dóttur mína í passamyndatöku
Farið í Perluna eins og góðum túrista sæmir á góðviðris degi
Elt berrasaðan dreng í Nauthólsvík
Lagt mig á miðjum degi - hið ljúfa líf
Sprangað um Smáralindina tvo daga í röð - persónulegt met.

Sumarfrí

2008-06-08T00:06:00.002Z

Jæja þá er langþráða sumarfríið byrjað. Ég var búin að heita því að ég mundi byrja aftur að blogga í sumarfríinu. Ég veit ekki hvað ég endist lengi og örugglega allir búnir að gefast upp á mér. Þetta er búinn að vera svakalegur vetur svo ekki sé meira sagt en engu að síður mjög skemmtilegur og lærdómsríkur. Ég held að ég hafi aldrei haft svona mikið að gera og þá er nú mikið sagt.
Ég trúi því varla hvað er mikið búið að ganga á að undanförnu, fyrst stóri skjálftinn á Suðurlandi (sem ég missti af og er geðveikt svekkt yfir) og svo ísbjarnargreyið sem kom hér sem ferðamaður og fékk þessar líka fínu móttökur. Núna bíður mitt lið eftir öðrum stórum jarðskjálfta, mér skilst að einhver miðill í Vestmannaeyjum sjái fyrir annan stóran skjálfta á næstunni. Munið bara að setja öll ljótu glösin fremst þannig að þau brotni örugglega fyrst :-) Nei, annars á ég ekki að vera að gera grín að þessu, það eru margir mjög hvekktir ennþá og líður ekki vel heima hjá sér. Þetta þarf bara að fara að klárast þannig að fólk geti farið að halda áfram sínu lífi, það er svo vont að lifa við hræðslu.
Framundan hjá 0kkur er bleikt 2ja ára afmæli og svo tekur við mikill svefn hjá þreyttu húsmóðurinni. Langþráður svefn.

2007-10-24T21:03:00.000Z

Svei mér þá að ég fari ekki bara að hætta þessu bloggstandi. Ég hef engan tíma til þess að blogga og ekki heldur til að lesa annarra manna blogg. Sjáum til, ég fer kannski að eignast smá líf og hef þá orku í annað en að sofa í sófanum öll kvöld. Ég bíð spennt eftir vetrarfríinu mínu og þá á sko að hvíla sig út í eitt. Veit reyndar ekki hvernig ég á að stilla mína litlu vekjaraklukku þannig að hún vakni ekki á slaginu 7.
Framundan er BBB hittingur þar sem dustað verður rykið af hljóðfærunum og ein góð æfing tekin. Hlakka BARA til.

Ég reyni að hafa tíma til að skrifa ef einhver skyldi álpast til að fara hingað inn og lesa þetta.

Til hamingju með daginn!

2007-08-12T22:39:00.000Z

Gaypride var um helgina og ég komst því miður ekki í gönguna eða á aðra fagnaðarfundi samkynhneigðra. Ég horfði hins vegar á Kastljósið á föstudaginn þegar var verið að tala við Palla og Heimi. Ég verð alltaf svo reið þegar verið er að mismuna fólki og langar helst að taka þá úr umferð sem geta ekki verið umburðarlyndir gagnvart öðrum. En ætli það mundi ekki líka teljast mismunun?? Ég er svo heppin að eiga fullt af vinum og enginn er eins - enda til hvers þá að eiga marga vini ef allir eru eins? Lífið væri svo leiðinlegt ef ekki væri þessi skemmtilega blanda af fólki sem horfir á hlutina á mismunandi hátt. Ég reyni að komast að ári og fagna því frelsi að geta sagt ,,Ég er eins og ég er".

Útilegur fyrir fiska

2007-07-31T21:50:00.000Z

Sumarið fer að verða búið! Allavega er rigningin komin. Ég byrja að vinna eftir viku og það verður örugglega mjög skrítið, en ég er viss um að það verður gaman. Verslunarmannahelgin í öllu sínu veldi fram undan og örugglega margir á leið í útilegu með milljónirnar í eftirdragi (bólar aðeins á öfund hér). Ég hef gefist upp á tjaldútilegum þetta sumarið og læt aðra um það. Verslunarmannahelgin er stórkostlegt fyrirbæri. Unglingarnir segja upp vinnunni til að geta farið með vinunum á fyllerí. Eldri unglingarnir (ég tilheyri þeim hópi) hittast með litlu fjölskyldurnar og fara á djúserí. Fullorðna fólkið (ég tilheyri ekki þeim hópi :-)) fara í sumarbústaðinn og fara á nett kenderí. Flestir með álagningarseðilinn í vasanum mis glaðir yfir innihaldinu og allir versla frá sér allt vit. Þeir sem hafa fengið eitthvað til baka ,,EIGA ÞAÐ SKILIÐ" að kaupa sér eitthvað fyrir vaxta/barnabæturnar því þeir hafa ekki átt pening allt árið og þeir sem þurfa að borga ,,EIGA ÞAÐ SKILIÐ" að kaupa sér eitthvað eftir allt streðið sem varð til þess að þeir þurftu að borga til baka. Um þessi mánaðarmót er því mikil sala á stórum sjónvörpum, gasgrillum, húsgögnum svo ekki sé talað um áfengið. Allir ,,EIGA ÞAÐ SKILIÐ" að fá eitthvað fallegt. Allavega, þá förum við sennilega öll eitthvert, í útilegu, í bústaðinn, á pöbbinn eða bara út í garð. Blessaða veðrið á ekki að vera upp á marga fiska - en hæfir sennilega best fiskum.

Manchester - kínversk prinsessa - húsbyggingar

2007-07-16T23:03:00.000Z

Það er svo margt skemmtilegt búið að gerast síðan síðast.
Við upplifðum aftur Manchester í öllu sínu veldi þegar við skruppum í helgarferð um daginn. Ég á svo yndislegt fólk í kringum mig og Gunnar og Þóra eru efst á listanum. Þessar elskur komu eitt kvöldið og buðust til að hafa börnin heila helgi. Við vorum ekki lengi að grípa hendina þegar okkur var réttur litli putti og pöntuðum okkur ferð frá fös. - mán. :-) Ágústa mín var svo góð að leyfa okkur að vera í nýja húsinu sínu. Hún og Andy voru að festa kaup á frábæru húsi og fengum við þann heiður að vera fyrstu gestirnir. Við vorum ekki svikin af dvölinni hjá Ágústu og Andy - við fengum 5 stjörnu þjónustu og var það fyrsta sem var gert var að keyra okkur í Fallowfield (þar sem við áttum heima) og kaupa KEBAB á SAJAAN (minn kebabstaður). Svo var dekrað við okkur alla helgina. Við fórum á snilldar ,,asian" veitingastað og borðuðum besta curry sem ég hef smakkað (og voru ófá curry-in sem fóru inn um mínar varir á sínum tíma). Við vorum svo heppin að hitta nokkra vini okkar í þessari stuttu heimsókn ásamt því að versla AÐEINS. Árna fannst þetta ekkert AÐEINS!!!!!!!!!!!!!!
Kebab og Stella Artois var aðaluppistaðan í fæðu helgarinnar og ég get ekki beðið eftir að komast aftur út til að fá mér annan KEBAB. Andy fannst við fyndin að koma til Englands gagngert til að fá okkur Tyrkneskan þjóðarrétt. Well, sorry - I eat Kebab rather than fish and chips :-)
Kro-bar stóð fyrir sínu og ásamt HM, Primark og öllum hinum góðu búðunum.

Heiða, Jón og Telma Rós voru að eignast litla stúlku sem þau sækja til Kína eftir nokkrar vikur. Við erum SVO hamingjusöm fyrir þeirra hönd og getum ekki beðið eftir að sjá dúlluna.

Við vorum í ,,landinu" um helgina að smíða gestahúsið. Það er búið að reisa grindina og gaman að sjá koma mynd á þetta allt saman. Í bongóblíðu nutum við þess að vera í sveitasælunni og krakkarnir léku sér óáreitt (fyrir utan það þegar þau voru að áreita hvert annað).

Er ekki í bloggstuði

2007-07-10T23:17:00.000Z

Ætlaði að blogga rosa mikið og segja ykkur frá Manchester ferðinni en eftir að hafa rent í gegnum bloggin og lesið heila býsn, skemmtilegt jafnt sem dapurlegt ákvað ég að láta þetta gott heita í dag. Er ekki stuði.

Hún á afmæli í dag, hún á afmæli í dag, hún á afmæli hún Linda Rós.

2007-07-02T23:29:00.000Z

Hún Linda mín á afmæli í dag. Til hamingju vinkona.

Síðan ég bloggaði síðast hef ég:

2007-07-02T22:24:00.000Z

Unnið baki brotnu óbrotin.
Sagt skilið við Mýrarhúsaskóla.
Dansað eins og bavíani í brúðkaupi.
Sleikt sólina.
Reitt arfa í garðinum og það sér ekki högg á vatni.
Dáðst að landinu mínu stóra og fallega í Villingaholtshreppi.
Skoðað fellihýsi og öfundað systur mína af sínu.
Hætt að öfundast yfir fellihýsum og pantað mér ferð til Manchester.
Hugleitt hvort það sé yfir höfuð gott að taka skyndiákvarðanir.
Krosslagt allt sem ég á fingur, tær o.fl. fyrir Heiðu vinkonu.
Verið of hreinskilin og liðið illa yfir því.
Reynt að svara spurningunni ,,hvað borða vörtusvín?"

Rökræður um ágæti tjaldhýsa

2007-06-26T11:42:00.000Z

Eftir að hafa rökrætt um það í viku hversu nauðsynlegt það er að eiga tjaldvagn, fellihýsi, hjólhýsi eða A-hýsi þegar maður fer bara 3 x á ári í útilegur skelltum við okkur í útilegu með okkar fína High Peak braggatjald (ég sem sagt vann rökræðurnar). Við pökkuðum dótinu í bílinn og það hefði ekki verið hægt að kaupa sér tyggjópakka á leiðinni því hann hefði ekki komist með. Í vagúmpökkuðum bíl keyrðum við syngjandi af stað austur á bóginn. Við minn fagra heimabæ myndaðist fyrsta röðin ... og svo við annan fagran bæ myndaðist sú næsta og svo komumst við áfram og á leiðarenda. Eftir klst streð tókst fjórum íturvöxnum manneskjum (ég þar á meðal) að reisa Lauru Ingals braggann - hann stóð á tjaldstæðinu eins og hluti af litlum minnihlutahóp innan um glæsilegu 30 m2 háhýsin og jeppastóðið. Ég stóð álengdar stolt af mínu híbýli sem hvíldi ekkert lán á og ég gat farið frá því án þess að hafa áhyggjur af því að krakkarnir í næstu tjöldum myndu skemma það með útileikföngunum sínum. Ennnnn..... svo kom ROKIÐ. Hvernig sem ég sannfærði sjálfa mig um að það mundi lægja þá gerðist ekki neitt. Með samanbitnar varir klæddist ég hlýrabol og stuttbuxum og neitaði því að veðrið væri ekki stórgott. Við sátum fyrir utan slotið á tjaldstólum í hávaðaroki og þá dundu ósköpin yfir. Ein stöngin gaf sig og prinsessan lá sofandi í kerru inni í tjaldinu. Eftir mikið strit tókst okkur að tjasla stönginni saman (prinsessan svaf áfram) og fengum lánaða krafttöng til að halda tjaldinu saman . VIÐ ÆTLUÐUM EKKI HEIM! Næstu nótt sváfum við með krafttöng yfir hausnum á okkur og vorum að DREPAST úr kulda í skuldlausu, bráðfallegu, Lauru Ingals, High Peak bragga tjaldinu okkar. Það er spurning hver vann þessar rökræður?

Mýsluafmæli og Golla styrktarbarn

2007-05-31T23:22:00.001Z

Jæja þetta virkar núna. Ég er samviskusamlega búin að skrifa inn nokkur blogg og svo þegar ég er búin að blaðra heilan helling og ætla að skella því á veraldarvefinn þá dettur allt út. Ég hef svo ekki haft orku né þolinmæði í að reyna að laga þetta fyrr en nú.

Ég veit eiginlega ekki hvar ég á að byrja, það er svo langt síðan ég bloggaði síðast. Núna eru örugglega allir mínir lesendur hættir að kíkja til mín. Ég fæ þó allavega að koma mínum helstu hugrenningum niður blað/skjá og það er oft alveg ágætt.
Það er merkisdagur í dag. Litla mýslan mín er 1 árs í dag og það er ótrúlegt að það sé ár síðan ég sá hana fyrst. Ég brosti út að eyrum og sagði við Árna að hún væri alveg eins og GF - nema með dálítið lengri augnhár, dekkri augabrýr o.s.frv. Hún var sem sé ekkert svakalega lík honum þegar allt kom til alls. Blessunin stóð sig í dag því hún byrjaði að ganga eins og góðum börnum sæmir og það á afmælisdaginn. Músin mín er sofnuð núna og hrýtur svo fallega innan úr herbergi - pen eins og mamma hennar.
Fjölskyldan eignaðist annað barn í dag þannig að núna erum við orðin 6, okkar heimatilbúnu börn og svo unglingarnir okkar í útlöndum, Ouma (13 ára strákur) í Úganda og Golla (12 ára stelpa) frá Indlandi sem við ætlum að reyna að fæða og klæða næstu árin. Dorotiya okkar sem við erum búin að styrkja í 11 ár hætti í skólanum í Úganda og því ekki þörf á okkar stuðningi lengur. Golla fær peningana í staðinn og veit ég að núna er partý einhversstaðar í moldarkofa séttlausrar fjölskyldu sem ekki hefur rafmagn, vatn, mat né annað sem okkur finnst meira en sjálfsagt. Golla okkar (skemmtilegt nafn) er 12 ára hnáta sem á framtíðina fyrir sér ef hún heldur rétt á spöðunum og vonandi hjálpum við henni úr þessari svakalegu fátækt sem hún býr við. Hún fær þó allavega eina máltíð á dag og það fleytir henni langt. Ég hvet dygga lesendur mína að skella sér á abc.is og styrkja barn, það gefur manni svo mikið að vita til þess að einhvers staðar er maður að gefa barni örlítið betra líf. Ef einhver er að hugsa að það væri nú gaman en það er svo mikið að borga þá vorkenni ég ykkur ekki neitt. 950 kr. er hægt að spara með því að fara sjaldnar á Subway, leigja færri spólur, drekka minna gos, borða minna nammi, kaupa skynsamlegar inn þannig að brauðið fari ekki í ruslið og svo mætti lengi telja. Engan aumingjaskap - drífið í þessu!!!

Ég vona að ég hafi allavega glatt hana Júlíu mína með þessari bloggfærslu :-)

OMG

2007-05-31T23:20:00.000Z

Ég er að fríka út á þessu bloggi - þetta er sem sagt prufa. Ég nenni ekki að skrifa margar blaðsíður sem detta svo út.

Síðan ég bloggaði síðast hef ég:

2007-03-23T23:33:00.000Z

byrjað að vinna
hitt gamla skólafélaga og safnað peningum
verið þakklát fyrir allt sem ég hef
verið ósátt við guð
fengið framtíðarkvíða
borðað of mikið
sofið of lítið
heimsótt Pindy og co
kennt smíði
kennt 10 ára strák að prjóna (mæli ekki með því)
kosið Hara og Jógvan í x-factor
fengið far með dráttarbíl (og minn bíll aftan í)
keypt landspildu í villimannahreppnum
dáðst að skriðtækni
fundið fyrstu tönnina hjá dótturinni
skrifað orðið ,,markmið" einum of oft

BINGÓ

2007-03-09T15:24:00.000Z

Laugardaginn 10. mars kl.14 í Langholtskirkju. Við ætlum að skemmta okkur saman, spila bingó, vinna nokkra vinninga og safna peningum fyrir litlu hetjuna hana Védísi Eddu.
ML-ingar eru hvattir til að mæta en annars er þetta opið fyrir alla sem vilja styrkja gott málefni.
Hlakka til að sjá ykkur!

Fannsíó pannsa organæser

2007-02-26T17:48:00.000Z

Hvað get ég sagt á þessum góða mánudegi. Hann er ekkert svo svakalega góður þegar litið er á nokkrar staðreyndir.

Í gærkvöldi fengum við öll ælupest
Í morgun var ég enn með magaverk
Þvotturinn hefur aldrei verið meiri
Íbúðin ber þess merki að veikindi komu upp

Ennnn..... þegar litið er á þessar staðreyndir þá er hann bara býsna góður þessi mánudagur

Við erum mjög heilbrigð öll sömul og ekki hægt að kvarta yfir smá ælu og ræp
Við verðum öll komin á gott ról í kvöld og Óskarinn endursýndur
Saumó var frestað þar til næsta mánudag og þá verð ég kannski búin að prjóna aðeins
Veðrið er fallegt og sólin skín inn um gluggana
Við fengum gott fólk til að versla fyrir okkur í matinn og hann birtist bara fyrir utan dyrnar án þess að við þyrftum að gera handtak - góð þjónusta - takk fyrir okkur Þóra og Gunnar.
Þetta var svona fjölskyldudagur - allir á náttfötunum - voðalega kósí.
Við eigum tvo yndislega gullmola sem brosa hvað sem á dynur.
Heyrði orðið köttapabbi (fress).
Þyrfti að endurskoða uppfræðslu ungviðisins :-)

Mánudagar eru góðir dagar :-)

Síðan ég bloggaði síðast hef ég

2007-02-21T09:05:00.000Z

farið í skemmtilegasta brúðkaup ever
Verið stolt af litlu dúllunum mínum
brosað svo mikið að ég fékk brosverk
setið eins og fín FRÖKEN við háborð
Hlustað á Geir Ólafs taka ,,my way"
Drukkið alltof mikið Pepsí Max
Unnið hörðum höndum að skólanámskrá
Borðað bollur
Hneykslast á sjálfri mér fyrir að hafa ekki bakað bollur
Kvatt Óla og Eileen
Verið leið yfir því að sjá þau ekki fljótt aftur
Talað ensku
Heyrt orðið horlífi - setti það í nýyrðasafnið :-)
Klætt GF í náttföt og sent hann í leikskólann
Panikað yfir því að vera að fara að vinna aftur
Hugsað um allt sem ég ætlaði að gera í fæðingarorlofinu
Gleymt að fara í ræktina (ójá ég gleymdi því í alvöru)
Hlakkað til að hitta vinkonurnar úr ML

Hún Þóra mín

2007-02-13T12:28:00.000Z

Ég bara verð að segja ykkur frá skemmtilegum degi sem ég átti með Þóru minni og hennar vinkonum á laugardaginn. Fröken Þóra mín var tekin með pompi og prakt og gæsuð af hennar dearest friends. Við náðum að plata hana svo mikið að hún vissi ekki hverju hún ætti að trúa. Allavega til að gera langa sögu stutta þá fórum við með hana í Kolaportið og fundum átfit, fórum á skauta í Egilshöll þar sem hún var með skautasýningu, fórum í pottinn á Mecca spa og svo var endað á Lækjarbrekku í dýrindis mat. Ég hef nú ekki tekið þátt í að gæsa margar skvísur en mér fannst þetta SVO skemmtilegt og gaman að kynnast öllum þessum góðu stelpum (ætlaði að skrifa konum en áttaði mig á því að ég skrifa konum þá er ég að viðurkenna að ég sé orðin kona og það gengur ekki).
Það er sem var best við þetta allt saman að hún Þóra mín var svo glöð að sjá allar vinkonur sínar samankomnar. Ef einhver á það skilið að vera dekrað við þá er það Þóra mín, hún er alltaf fyrst til að gera eitthvað gott fyrir aðra og leggur alltaf mikið á sig til að öllum líði vel. Hún er mesta krúttið og ég get ekki beðið eftir deginum mikla þegar hún giftist Gunnari sínum. Ég hlakka svvvvooooo til.

Nýtt ár

2007-02-07T15:00:00.000Z

Eftir mikið bloggleysi er komið nýtt ár með öllu tilheyrandi. Skrítið hvað ég er lengi að venjast því að skrifa nýtt ártal. Janúar er liðinn og stutt í það að ég fari að vinna aftur. Við hjónaleysin skruppum til London um helgina og það var kærkomið frí. Hafði ekki sofið heila nótt í u.þ.b. eitt ár og var svefninum fegin. Við reyndum nú samt að eyða ekki ferðinni í svefn og nýttum tímann vel. Við hittum Íslendinga í London og máttum líka til með að kíkja aðeins í búðir á Oxford Street. Við vorum alveg svakalega heppin með veður og áttum góðan tíma með skemmtilegasta fólkinu - Gunnari, Þóru, Moniku og Júlla. Það var svo gott að koma heim og vera vakinn með ísköldum tásum sem boruðu sér á milli okkar og eigandinn (lítill maður) bað góðan daginn (kl. 7). Við fengum líka sólskinsbros frá litlu heimasætunni.

Peningar!

2006-11-25T01:39:00.000Z

Er að reyna að fá ekki vægt taugaáfall yfir peningaleysi en það gengur illa. Merkilegt hvað þeir geta farið í skapið á manni. Náði samt að eyða slatta í dag þegar ég fór með systu í kringluna. Labbaði fram hjá búð sem selur stígvél á 39.990 - slagar hátt í afborgunina af íbúðinni minni. Ég gæti sennilega keypt þau ef ég hefði grætt 15 milljarða eins og Björgúlfur yngri. Ég er alltaf að reyna að finna uppá einhverju sem gerir mig ríka. Finnst stundum eins og ég kunni ekki neitt. Hverjum datt það í hug að gerast kennari - ekkert hægt að græða á því. Var að spá í að taka að mér að skrifa ritgerðir fyrir fólk, en það stangast á við mínar skoðanir sem kennari og gefur sennilega ekki mikið af sér. Ég þarf að finna uppá einhverju snilldarlegu sem gefur mér fulla vasa fjár - einhverjar uppástungur. Ég get ekki skilið hvernig fólk getur keypt hús sem kostar 85 milljónir - hver ætli rafmagnsreikningurinn sé, svo ekki sé talað um þjófavörnina og allt sem því fylgir að eiga glæsihöll.
Einhvern tímann taldi ég upp bækurnar á náttborðinu hjá mér og hét því að vera duglegri að lesa. Síðan þá eru 3 búnar og margar eftir (ein enn í plastinu). Byrjaði aftur á móðir í hjáverkum og stundum finnst mér eins og þetta sé saga af mér, allavega sumir hlutar hennar. Nú þori ég ekki að biðja um bók í jólagjöf af því ég á eftir að lesa svo margar.
Ég byrjaði í ræktinni í síðustu viku en að sjálfsögðu varð AK veik þannig að ræktardagar mínir eru taldir. Þarf örugglega jafn mikið átak að koma mér aftur af stað eins og fyrst þegar ég skreiddist inn um hurðina á Hreyfingu, gjörsamlega að deyja úr hræðslu. Lifði fyrsta tímann af en það var samt mjög tæpt.
Mig vantar hugmyndir að jólagjöf handa Árna - verður að vera rómantískt - ekki borvél eða eitthvað svoleiðis.
Yfir og út

Jólamanual óskast

2006-10-29T10:37:00.000Z

Það eru fleiri en Matta mín sem standa í framkvæmdum. Ég er bara svo heppin að ég þarf enga Pólverja til mín, ég á svo ask... handlaginn föður sem gerir þetta með dyggri aðstoð Árna míns. Ég sé fram á að vera að mála fram að jólum og leiðist þá ekki á meðan.

Varðandi jólin og allt jólaskrautið sem komið er í verslanir. Ég veit ekki hvort ég á að vera þessi grautfúla sem fussar og sveiar yfir þessu og skilur ekki í þessu liði sem kaupir jólaskraut 2 mánuðum fyrir jól eða hvort ég á að taka því fagnandi að fólk skreyti snemma hjá sér og njóti aðventunnar og kaupi jólagjafirnar í janúar (þekki eina). Var að spá í að vera þessi seinni, glaða típan sem er búin að vinna svo mikið í sjálfri sér að hún þarf ekki að vera að fussa og sveia yfir einhverju sem skiptir ekki máli. Getur tekið meðvitaða ákvörðun um að kaupa jólaskraut með bros á vör í lok október eða bara hreinlega sleppt því og allir eru glaðir. Getur einhver þá leiðbeint mér hvernig ég útskýri fyrir ungviðinu á heimilinu að 60 dagar er svolítið langur tími og playmofótboltaspilið er ennþá í búðinni en ekki komið í jólapakkann eins og óskað er eftir. Tek á móti öllum leiðbeiningum stórum sem smáum.

Einangraðar hleranir

2006-10-18T00:01:00.000Z

,,Ég er hér, gettu hver, apinn!" ó já ég fór í Eden í Hveragerði með Gunnar Franz og Örnu Kristínu. Við skruppum til mömmu og pabba til að forðast ryk, hávaða og alls kyns viðbjóð. Það var gott að komast í hreina loftið og heimsækja ömmu og Kollu. Steypuryk og drulla er eitthvað sem ég verð að lifa við aðeins lengur en núna erum við að ganga frá og pollurinn úti í garði er að fara sem betur fer. Við Árni erum alltaf að læra eitthvað nýtt á hverjum degi og verðum örugglega ágætis iðnaðarmenn eftir svona ca. 10 ár. Þá skrái ég okkur í ástralska þáttinn "The Block". Ég er t.d. búin að einangra nokkur rör og Árni er búinn að einangra rör, leggja rör, aftengja klósettið (jammí), brjóta steypu, gera við leka í uppþvottavélinni og margt fleira. Var einhver þarna úti sem hafði ekki trú á okkur???

Það sem er efst á baugi í þjóðfélaginu í dag er hlerunarmálið. Mér finnst þetta alveg borðleggjandi, það var allt hlerað og það vita allir allt þannig að gleymið þessu bara og haldið áfram að sinna málum sem skipta máli. Hmmm, eru kannski einhverjir miklir hagsmunir í húfi? Er það einhver annar en Davíð Oddson sem á Ísland? Er kolkrabbinn könguló? Var Stundin okkar pólitískt afl, dulkóðaðar útpældar setningar ætlaðar ráðmönnum úti í hinum stóra heimi?
Það er alls staðar hlerað - á Laugarvatni var nóg að skella eyranu upp að veggnum þá heyrði maður allt, já eða bara opna gluggann þá var neðri hæðin coveruð. Ég segi það ekki að málefnin hafi verið ýkja merkileg miðað við heimsmálin en það var samt alltaf gott að vita vissa hluti - hverjir heimsóttu hvern á nóttunni o.s.frv. :-)

Elsku besti Andy minn, of course we want to visit you too - you are the main reason (don't tell Agusta ;-)). Við verðum að finna góðan tíma til að koma og tjútta með ykkur - ég væri alveg til í einn Guinness og feitan Kebab.

Síðan ég bloggaði síðast hef ég:

2006-09-27T22:17:00.000Z

- Horft á pabba brjóta flísar og steypu inni á baði.
- Borðað sykurlaust súkkulaði.
- Farið í heimsókn í Stykkishólm.
- Hlustað á þungarokk (frá Finnlandi).
- Rifjað upp góða daga í Húrí heima hjá Önnu Þóru.
- Skoðað fasteignaauglýsingar.
- Reynt að líta á björtu hliðarnar.
- vonast til að komast til Ágústu í Manchester, mjög fljótlega.

Píparaskoran og Pollýanna

2006-09-19T23:55:00.000Z

Aldrei hefði ég trúað því að ég ætti eftir að hitta 4 pípara í þessari viku...og nota bene enginn af þeim var með píparaskoru :-) Dómur hefur fallið, það þarf að leggja kalda vatnið uppá nýtt í minni fallegu íbúð. Hvað eru nokkrir hundraðþúsundkallar á milli vina. Ég er orðin svo vön peninga-áföllum að ég kippi mér ekkert upp við þetta. Minni mig alltaf á að þetta gæti verið verra. Það er mikið búið að vitna í hana Pollýönnu blessaða og ekki slæmt að hafa svona heimsbókmenntir til að styðjast við þegar mikið er í húfi. Þetta er sennilega sú bók sem hefur haft hvað mest áhrif á líf mitt. Ég vitna allavega oftar í hana en t.d. Njálu eða Sjálfstætt fólk þótt að þær séu ágætar til að slá um sig (þ.e. þeir kaflar sem ég hef lesið og var svo heppin að fá einmitt á stúdentsprófi).
Talandi um heppni þá er fataskápurinn minn alltaf að verða betri og betri - eftir nokkrar áttaksvikur og sykurskort hef ég eignast fleiri flíkur og án þess að eyða krónu í þær. Ég mæli með þessu fyrir alla sem eru í fjárhagskröggum :-)
Fyrstu spár um frost heyrast núna í útvarpinu og ég get ekki beðið eftir að snjórinn láti sjá sig.....en svo er ég yfirleitt komin með leið á honum eftir nokkra daga og vil fá auðar og fínar götur. Eins gott að skaparinn hlusti ekki mikið á mig. Hann hlustaði allavega ekki þegar ég bað um ódýra lausn á kaldavatnsvandanum.

Rólópælingar

2006-09-05T22:59:00.000Z

Síðustu dagar hafa verið atburðalitlir þangað til í dag. Ég fór á róló eins og góðri móður sæmir, en nota bene var í símanum helminginn af tímanum eins og góðri nútíma ungri móður sæmir :) Þegar ég loksins hætti að tala í símann og eftir að 40 x hafi verið kallað mamma þá kom þar að yndislega gömul og sæt kona. Hún fór að spjalla við mig um daginn og veginn. Eftir u.þ.b. hálftíma spjall vissi ég nokkuð mikið um þessa geðþekku konu sem er búin að búa í götunni minni í hjartnær 49 ár. Ég fór að hugsa um það hvort að ég mundi finna mér einhvern svona góðan stað (og gott hús) og búa þar hálfa ævina. Það hlýtur að vera dálítið merkilegt að horfa á allt fólkið koma og fara og muna tímana tvenna í hverfinu.

Mitt helsta áhugamál þessa dagana er að reyna að elda grænmeti á sem fjölbreyttasta máta. Ótrúlegt hvað ég hef verið löt við að tileinka mér grænmetisrétti. Hafði t.d. aldrei bakað eggaldinn þangað til í síðustu viku og það er BARA gott. Ef einhverjir luma á góðum grænmetisuppskriftum endilega látið þær flakka.

Mitt annað helsta áhugamál þessa dagana, eftir að hafa upplifað margt undanfarið, er að minna mig á hvað ég er heppin manneskja. Ég er heilbrigð, á heilbrigða fjölskyldu og yndislega vini sem gefa lífinu gildi. Hef líka verið að hugsa um hvað það er nauðsynlegt að rækta vinskapinn og taka það ekki sem sjálfsögðum hlut að maður eigi vini í hverju horni. Ég lagði mitt af mörkum um helgina og hitti nokkra vini mína - m.a. á Ljósanótt og á Landspítalanum. Þið þarna úti sem álpist hingað inn og lesið þetta - hættið að lesa og farið og hringið/hittið vini ykkar og fjölskyldu.

Lifur í Norðlingaholtinu?

2006-09-02T00:47:00.000Z

Ótrúlegt en satt þá var ég með lifur í matinn í kvöld (föstudagskvöld). Lifur er eitthvað sem maður borðaði sem barn og fannst ekkert sérstaklega góð en þar sem ég er svo vel upp alin þá sagði maður ekki neitt heldur skellti þessu í andlitið á sér og punktur. Núna ÞARF ég að borða lifur og ákvað því að elda hana í kvöld. Ég finn ennþá blóðlyktina af höndunum á mér og mig hryllir við lyktinni. Ég komst sem sagt að því í kvöld að mér finnst lifur ekki vond en ég get ekki hugsað mér að elda hana - læt annan í málið :-)

Norðlingaholtið heillar mig þessa dagana en ég var einmitt í heimsókn þar og varð hugfangin af berjamónum allt í kringum húsin (heillaðist þó ekki af byggingakrönunum). Haldiði að það sé ekki munur að geta bara fengið bláber við húsvegginn, beint í ísinn. 35 mín í Hveró og ég gæti ekki verið meira í leiðinni fyrir allt liðið sem er að koma í bæinn :-) Hvað segið þið - eigum við ekki bara að flytja í Norðlingaholtið?

Var að klára Skugga-Baldur og er byrjuð á Móðir í hjáverkum - svakalega skemmtilega skrifuð bók. Staflinn hefur minnkað :-)

Síðan ég bloggaði síðast hef ég:

2006-08-27T22:53:00.000Z

tínt rifsber meðal geitunga.
tínt jarðaber meðal snígla.
ekki borðað neitt nammi.
borðað 300 gr. af grænmeti í hádeginu og á kvöldin.
rætt alvarleg málefni.
þráð að fara til útlanda.
stytt buxur.
fengið foreldra mína heila heim frá útlöndum.
og margt margt fleira skemmtilegt.

Vinir mínir geitungarnir

2006-08-25T22:14:00.000Z

Ótrúlegustu hlutir stjórna lífi okkar - af því að við erum haldin einhvers konar fælni. Ég hef t.d. verið að taka mig á upp á síðkastið og horfast í augu við minn helsta óvin - geitunginn. Það var nú reyndar dálítið fyndið að sjá mig því ég lá á hnjánum útí miðju beði og var að reita arfa, reglulega stökk ég upp og hrópaði af því að ég sá geitung nálgast, en arfinn skildi fara sama hversu hrædd ég var. Rifsberin kalla á mig að þau verði tínd og búin til dýrindis sulta úr þeim en ég þarf að horfast í augu við vini mína og þá gugna ég. Jarðaberin eru líka öskrandi á mig, tilbúin með ísnum og súkkulaðisósunni, en sama sagan - vinirnir stjórna mér. Ég hef verið að reyna að sýna ekki stráknum þessa hræðslu því ég vil ekki ala á ótta hjá honum sérstaklega af því að ég veit að það er óþarfi að óttast þessi kvikindi. Örfáar hræður eru með ofnæmi fyrir þeim og þurfa lyf ef þeir eru stungnir og það er alveg nógur tími til að fara uppá slysó ef það gerist. Maður dettur ekki bara niður dauður. En hvað veldur fælni?

Hér koma nokkur athyglisverð atriði varðandi fælni tengd köngulóm, tekin af Vísindavefnum:

Hræðsla við köngulær og önnur smádýr er oftast ástæðulaus. Hún er þó furðu algeng, sem gæti stafað af því að náttúruval hafi í árdaga verið þeim hliðhollt sem kunnu að forðast smádýr. Einnig er víst að fólk lærir af umhverfi sínu hvað beri að forðast.
Það er kallað fælni (e. phobia) þegar fólk er haldið ástæðulausum en fremur mögnuðum ótta við tiltekið fyrirbæri, þannig að það hái því í daglegu lífi. Fælni er einkum skýrð með tvennum hætti. Í fyrsta lagi lærir fólk - ef svo má að orði komast - að vera hrætt. Það gerist stundum með því að fólk lendir í hræðilegum eða ógnvekjandi aðstæðum - til dæmis ræðst hundur á það, eða það lokast inni í loftlítilli lyftu. Það verður síðan hrætt við viðkomandi fyrirbæri og aðstæður sem tengjast þeim, löngu eftir að öll raunhæf hætta er úr sögunni. Einnig getur fólk lært að hræðast tiltekna hluti af því að fylgjast með öðrum sem óttast þá. Til dæmis getur barn tileinkað sér ótta við fyrirbæri sem það sér foreldri eða systkin óttast. Auk námsferla benda þeir sem rannsaka ótta líka á að mannfólki virðist tamara að óttast suma hluti en aðra. Líklegast er einnig að allnokkur munur sé á fólki í þessu efni; sumum sé miklu hættara að þróa með sér fælni en öðrum.

Eins og mig grunaði þá er ég að dreifa vitleysunni til barnanna, þannig að hingað og ekki lengra. Ég ætla sem sagt að vera í þessu næstu daga - fara út í garð og stíga í óttann. Það gerist þó ekki neitt verra en það að ísskápurinn fyllist af rifsberjasultu og gómsætum jarðaberjum.

Ælupollar og húðflúr

2006-08-24T21:09:00.000Z

Ja hérna hér! Það rignir yfir mig hamingjuóskunum. Það er eins gott að standa sig í stykkinu.
Ég er aldeilis búin að fá það aftur í hausinn að hafa haldið því fram að líf mitt væri að róast. Krílin mín hafa látið hafa fyrir sér svo ekki sé meira sagt. Það borgar sig ekki að vera með svona yfirlýsingar. Til að lýsa ástandinu þá er ég ógreidd, með ælupolla á öxlunum (síðan í hádeginu) og búin að taka aðra panodil eftir mikinn grát. Ennnnn bara svo það sé alveg á hreinu þá er ég mjög ánægð með hlutskipti mitt (verð samt ánægðari þegar panodilið fer að ,,kick in")
Bókastaflinn FER af náttborðinu :-)

Efst á baugi er að sjálfsögðu Rockstar - SUPERNOVA, en hvað hefur sá þáttur gert fyrir mig:
- gefið mér tilefni til að vaka fram á nótt og ástæðu til að sofa frameftir daginn eftir.
- hefur breytt skoðun minni á húðflúri.
- ég hef spurt mig over and over af hverju þurfa rokkkvenmannsföt að vera svona ,,working - girl" -leg.
Á hverjum þriðjudegi segi ég ,,ég ætla ekki að vaka í kvöld" en hvað gerist, ég vaki og er svo að deyja úr þreytu daginn eftir. Á hverjum miðvikudegi segi ég ,,ég ætla ekki að vaka í kvöld" og sagan endurtekur sig. Rockstar-SUPERNOVA hefur sem sagt kennt mér hvað ég hef ekkert vald yfir sjálfri mér (ekki að það væru einhverjar nýjar fréttir).

Haustið er tíminn

2006-08-22T23:18:00.000Z

Skrítið hvað haustið hefur alltaf haft mikil áhrif á mig. Á haustin fer að dimma aftur og kerti verða uppáhalds hlutirnir mínir. Ekkert er eins þægilegt en að hjúfra sig undir teppi uppí sófa, horfa á sjónvarpið og allt er fullt af kertum. Á haustin breyta margir til - fara í skóla, taka sig á í ræktinni, byrja í nýrri vinnu o.s.frv. Ég held að ein af ástæðunum fyrir því að ég gerðist kennari var tilbreytingin og hvað það er gaman að mæta aftur í vinnu á haustin. Það myndast alltaf svo skemmtileg stemning þegar maður fer í bókabúðina og sér alla krakkana kaupa skóladót og sumir að fá skóladót í fyrsta skipti. Foreldrarnir sumir stressaðir að senda barnið í skólann og veit ég nokkur dæmi um að foreldrar hafi fellt tár á fyrsta skóladegi barnsins. Ég er líka svo mikil vetrarmanneskja - ég bíð eftir vetrinum. Sennilega útaf ofnæminu góða sem hefur reyndar lítið verið að hrella mig í sumar en líka útaf snjónum.

Ég fór í Ikea í dag sem er nú ekki frásögu færandi nema það að ég fór með MIÐA í Ikea, eins og þegar maður fer í matvöruverslun - ég þurfti að kaupa svo marga hluti og var alveg viss um að gleyma einhverju þannig að bleiki miðinn fór með. Það var nú dæmigert að næstum ekkert var til af því sem ég ætlaði að kaupa. Ég hitti systu í kaffiteríunni og þegar ég beið eftir afgreiðslu sá ég miða liggja ofaná Svalafernunum í kælinum og það merkilega við þennan (illa skrifaða) miða var að eigandinn ætlaði að kaupa nánast það sama og ég. Skrítið!

Mælikvarðinn á það að líf mitt er að róast eftir erilsamt sumar er að ég er byrjuð að lesa aftur. Þeir sem voru með mér í Kennó muna kannski eftir því að nánast í hverjum fyrirlestri kynnti kennarinn okkur fyrir ,,The BOOK" og alltaf sögðu þau ,,þessa verðið þið að hafa á náttborðinu". Ég hugsaði oft um það að fá mér góða bókahillu við hliðina á rúminu til að koma öllum þessum bókum fyrir :-) Núna er kominn góður stafli á náttborðið sem ég á eftir að lesa eða er nýbúin með.
- Skugga Baldur eftir Sjón - mjög góð bók, er alveg að verða búin með hana.
- Að venja á kopp á einum degi - Algjör snilld - talandi um að virka vel - nauðsynleg!!!!!
- Móðir í hjáverkum - Verð að viðurkenna að hún er enn í plastinu en er næst á dagskrá.
- Memoirs of a Geisha - Hálfkláruð.
- Bókin um barnið - er að lesa hana í annað sinn og veitir ekki af.
- Good women of China - Rosalega góð bók sem allir ættu að lesa sem hafa einhvern áhuga á asískri menningu.
- Belladonna skjalið - er búin að byrja 2 á henni en næ ekki að halda mér við efnið - en ég SKAL klára hana.
Þið sjáið það á þessum lista að ég verð upptekin næstu kvöld :-)

Þegar ég verð stór!

2006-08-20T22:20:00.000Z

Ok, ég verð að viðurkenna að það er leiðinlegt að skrifa bara fyrir sjálfan sig - svo langt sem það nær. Ég verð sennilega að auglýsa bloggið mitt og reyna eftir fremsta megni að hafa eitthvað frambærilegt efni til lesturs hér á þessari síðu. Sjáum hvort það virkar eitthvað :-)
Það sem er efsta á baugi hjá mér þessa daga og vikur er hvort við fjölskyldan eigum að flytja austur fyrir fjall. Fyrir suma er það ekki spurning að það sé það eina rétta í stöðunni að kaupa hús í Hveragerði/á Selfossi og setjast þar að með unganga okkar tvo. Jú jú það er ekki svo galið sérstaklega ef við horfum á íbúðaverð. Við gætum fengið stórt einbýlishús með palli og potti fyrir sama verð og hæð hér í Reykjavík. En þá er komið að aðal málinu í þessu öllu saman og það er vinnan. Við verðum bæði að hafa frambærilega vinnu fyrir austan ef dæmið á að ganga upp. Við eyðum mestum parti dagsins í vinnunni og því er alveg nauðsynlegt að maður sé ánægður í vinnunni og að hún sé krefjandi á einhvern hátt. Það er auðvitað hægt að keyra á milli en mér finnst tíminn líka dýrmætur og sérstaklega þegar börn eru í spilinu sem fara að sofa klukkan átta á kvöldin. Það sést örugglega á þessum skrifum mínum hvoru megin borðsins ég er í dag en það gæti hæglega breyst á morgun.

Formlega orðin bloggari

2006-08-19T16:39:00.000Z

Aldrei hefði mig grunað að ég mundi gerast bloggari. En það er það sem er svo skemmtilegt við þetta allt saman að maður veit aldrei hvað gæti gerst og núna fékk ég þá skyndihugdettu að gerast bloggari. Einhver sagði líka að konur með lítil börn gera marga skrítna hluti án þess endilega að ákveða það sérstaklega eða vita af hverju þær gerðu það. Þetta er eitt af því. Það sem mér finnst líka dálítið merkilegt við allt þetta blogg er hvað margir gefa sér tíma til að lesa þetta. Ég geri mér samt fulla grein fyrir því að maður verður að auglýsa bloggið sitt, hafa eitthvað merkilegt að segja og vera svolítið skemmtilegur til þess að einhver eyði sínum dýrmæta tíma í lestur. Ég var að hugsa um að auglýsa það ekki og athuga hvort einhver mundi ramba hingað inn. Ef þú lest þetta þá endilega skrifaðu komment og taktu þátt í rannsókninni.